Sit tibi terra levis, Benedicte! Maxima cum maestitia totus orbs catholicus luget mortem Benedicti XVI, Pontificis emeriti qui ante Kal. Ian. anno MMXXIII sanctam animam suam Deo misericordi reddidit. Sodales etiam Facultatis commendant Iudici iusto, Aeterno Pastori, animam tanti Antistitis qui pietate doctrina virtute profecto Magnus est cognominandus. Quis obliviscatur eum strenuum fuisse propugnatorem Linguae Latinae? Anno VII Pontificatus sui, litteras misit Carolo Nanni, tunc temporis Pontificiae Universitatis Salesianae Rectori Magnifico, q.i. Feliciter appetit, ut gratularetur Facultati nostrae quinquagesimo anno a Pontificio Instituto Altioris Latinitatis condito. His in litteris scripsit et est ominatus Benedictus: “ Exoptamus ut in posteros annos quam uberrimos fructus gignat, quo discipuli efficacius pleniusque instituantur”. Eodem anno Pontificiam Academiam Latinitatis fundavit cuius secretarium renuntiavit Robertum Spataro, insignem Facultatis nostrae magistrum. Pluries est insuper hortatus ut usus Linguae Latinae adhiberetur in Sacris Litandis. Intercedat pro nobis de aulis beatis!