Die Lunae proxima, in urbe Paulinopoli, apud Brasilienses, praelectionum Instituti Theologiae Pii XI, a Salesianis Patribus recti, initium rite captum est. Ut mos maiorum praecipit, omnes, sive alumni sive professores, Sanctam Missam, cui antistes Iundiaiensis, Arnaldus nomine, praefuit, multo mane participaverunt; deinde, post frugi ientaculum sumptum, in conclavi magno aures benevole praebuerunt Aloisio Lima, magistro Brasiliensi Facultatis nostrae, qui de sermonum Romanorum Graecorumque momento ad studia theologica peragenda suaviter est locutus.